हमरा नहि भेटल भगवान

पंडित, ज्ञानी जहिना कहलन्हिं, तहिना केलहुँ पूजा ध्यान। 

आन  लोक  केँ  भेटल हेतन्हिं, हमरा नहि भेटल भगवान।।

धर्म-स्थल मे सगरो हलचल, देखल बहुतो आँखि मे छलछल।

जे छथि धर्मक बनल मुर्जना, रोज देखाबथि अप्पन छलबल।

भेद कियै ई जगत-पिता अछि, हम सब अपनहिं के सन्तान??

आन लोक केँ -----

कतेक  बेर  ई  सुनल दुबारा, छथि सभहक भगवान सहारा।

घर - घर  मे  पूजन  भगवन  के, तैयो  दुख  मे लोक बेचारा।

परम-पिता ई कोना   देखय छी, पिता-धर्म के नित अपमान??

आन लोक केँ -----

ज्ञान - बुद्धि - सत्काम अहाँ छी, जीवन-पूर्णविराम अहाँ छी।

दुखी  सुमन  के आस अहीं पर, निर्बल के बलराम अहाँ छी।

हे परमेश्वर कहुना करियौ, सभहक सुख - दुख एक समान??

आन लोक केँ -----